الحدود النفسية 2

#الحدود_النفسية2 _

مرض السيطرة
يا عيني علي الاهل و الازواج و الزوجات اللي عندهم مرض السيطرة و مش فاهمين ان دة مرض. الام المصرية الاصيلة و الاب المصري اللي فاكر ابنه لازم يكون نسخة منه أو يكون بيطيع أوامره و مبادئه في الحياه و يمشي علي رؤيته للأمور و خبراته. أيه رأيك تسيب ابنك يعيش حياته هو ... و تتكون افكاره هو .. و يشوف رؤيته هو ... و يكتسب خبراته هو و يخوض تجاربه هو ... و يكون هو ....
بلاش السيطرة الرهيبة اللي ممكن توصل ان حضرتك تختارله البنت اللي هو هايتجوزها .... الجميل في الموضوع إن في أهل فاكرين ان دة حماية و حب و خوف علي أولادهم ..

( بالمناسبه احب اشكر باباعلي انه اب مثالي في عدم السيطرة ... من صغري اعطاني مساحتي من الحرية مع التوجيه .. الحرية منه مع نصائح أمي كانوا mix ممتاز .. علمني أخد قراراتي بنفسي ، علمني اكون مستقلة ... شجعني علي ال career shift اللي ممكن كل جيله يشوفوه جنان رسمي ... احترم اخياراتي مهما كانت ...بيحترم أرائي مهما كانت محدودة بالنسبة لخبرته و معرفته العميقة ... I love you )

نرجع لموضوعنا

المشكلة يا جماعة ان المشكلة مش هتقف لحد علاقة الاهل بأولادهم ...
كل ابن و ابنه فيما بعد بيطبقوا دة في جوازهم... معتقد ان هو لازم يسيطر علي شريك حياته في كل تحركاته و الطريقه اللي يتصرف بيها و ازاي يقضي وقته و مع مين و ينام امتي و يأكل الفول عليه ليمون أو لأ و يخس و لاا مايخسش...بجد كدة over

محتاجين نحترم الحدود النفسية لأقرب الناس لينا ... نخليهم يعيشوا كما هم و ليس كما نريدونهم أن يكونوا.
وافتكروا كويس ان الصحة النفسية بتقول انك و لا تسيطر علي حد و لا تسمح لحد يسيطر عليك. .
و عايزين نفتكر كمان ان ربنا ذات نفسه بيحترم حريتنا و بيترك لينا حرية الاختيار و المسافة و الارادة اننا نعيش معاه. ربنا مش بيفرض نفسه علينا .. ربنا خلقنا مخيرين