المشاعر مفهاش جدل :)

   

من يومين كنت بتكلم  مع عقلية من العقليات المحترمة جدا اللي فعلا بيجبروني علي أحترام أسلوب تفكيرهم لأنه مميز و ناضج. وصلنا لنقطة أحب أني أشاركها.  و هي ان 

المشاعر مش بتتناقش بمعني أن بجد أكتر حاجه مفيش فيها جدل هي المشاعر الانسانية.

ماينفعش مثلا انك تقول لواحد انت ليه الموضوع ده يزعلك , أصله موضوع مايستاهلش ( هو الحقيقة مش انت اللي تحدد هو يستاهل بالنسباله ولا لأ)   و ماينفعش مثلا تقول لواحد مش مفروض الأمر الفلاني يخوفك , انت مكبر الموضوع , أو انت تافه و فرحان بحاجة تافهة . مش انت اللي هاتحدد للناس يحسوا بأيه و مايحسوش بأيه.  عشان كدة المشاعر الانسانية دي حاجة تحترم. و حتي لو بالنسبالك مش في محلها لازم تحترم احساس اللي قدامك.

الكلام أخدنا و افتكرت موقف حصل معايا . ان مرة الlaptop  بتاعي اتحرق وقتها زعلت جدا  و بصراحة مكنش زعلي وقتها علي الlaptop  لاكن كان علي حاجة ألفتها و حصل العطل دة قبل لما أعمل save   لل document و نسيت كل اللي كتبته اللي وقتها جالي زي قطر من الأفكار بشكل مبدع (من اللي بيجوا في العمر مرة ).  طبعا وقتها تلقيت ضحك و تريقة  و تقليل من لزوم الزعل و كأن مش مفروض أزعل أصلا. و أكيد دة كان مؤلم أكتر من اللي خسرته ذات نفسه.

العايزة أقوله أن مشاعر اللي قدامك لازم تحترمها حتي لو كانت مش علي هواك و مش داخلة دماغك.

ناردين

14 يوليو 2017